कॅन्सर तपासणी आणि जनजागृती शिबिर यशस्वीरित्या संपन्न
बदलापुरात नागरिकांचा विलक्षण सहभाग, आरोग्य विभागाच्या प्रयत्नांचे कौतुक
ठाणे (आफताब शेख)
ठाणे जिल्ह्यातील नागरिकांना दर्जेदार, उत्तम आणि कार्यक्षम आरोग्य सेवा उपलब्ध करून देण्याच्या उद्देशाने जिल्हा परिषद ठाणे आणि इंडियन कॅन्सर सोसायटी यांच्या संयुक्त विद्यमाने प्राथमिक आरोग्य केंद्र, बदलापूर येथे असंसर्गजन्य रोग तपासणी आणि जनजागृती शिबिराचे आयोजन करण्यात आले होते. जिल्हाधिकारी डॉ.श्रीकृष्ण पांचाळ (आयबीएस), मुख्य कार्यकारी अधिकारी मनोज रानडे, जिल्हा शल्यचिकित्सक डॉ.कैलास पवार, जिल्हा आरोग्य अधिकारी डॉ.गंगाधर पारगे यांच्या मार्गदर्शनाखाली शिबिराचे आयोजन करण्यात आले होते.
कॅन्सरचे लवकर निदान करणे, नागरिकांमध्ये जागृती करणे आणि निरोगी जीवनशैली अंगीकारण्यासाठी त्यांना जागरुक करणे हा या शिबिराचा मुख्य उद्देश होता. यावेळी तोंडाचा कर्करोग, स्तनाचा कर्करोग आणि गर्भाशयाच्या मुखाचा कर्करोग, तसेच मधुमेह, उच्च रक्तदाब या आजारांची तपासणी करण्यात आली. तज्ञ डॉक्टरांनी 30 वर्षांपेक्षा जास्त वयाच्या नागरिकांची तपासणी केली, तर महिलांची एचपीव्ही डीएनए आणि व्हीआयए चाचणीद्वारे गर्भाशयाच्या मुखाच्या कर्करोगाची तपासणी करण्यात आली.
शिबिराचा एकूण 56 नागरिकांनी लाभ घेतला, त्यात 13 पुरुष आणि 43 महिलांचा समावेश आहे. तपासणी दरम्यान, मौखिक आणि स्त्रीरोग तज्ञांनी तपशीलवार तपासणी केली तर वैद्यकीय पथकाने मधुमेह आणि रक्तदाब तपासणीसह योग्य वैद्यकीय सल्ला दिला. यावेळी डॉ.प्रशांत कनोजा, डॉ.अश्विनी विने, आरोग्य सहाय्यक शोभांगी नेवरे, जितेंद्र बोरकर, प्राची भदे व पीएचसी बदलापूरच्या आरोग्य सहाय्यक माया केदार यांच्यासह इंडियन कॅन्सर सोसायटीचे तज्ञ डॉक्टर व कर्मचारी उपस्थित होते. UPHC कात्रप आशा वर्कर संजीवनी पाटील, अश्विनी बनसोड आणि इतर स्वयंसेवकांनीही सक्रिय भूमिका बजावली.
जिल्हा आरोग्य अधिकारी डॉ.गंगाधर पारगे म्हणाले की, ग्रामीण व निमशहरी भागात कर्करोग, मधुमेह व उच्च रक्तदाबाच्या रुग्णांमध्ये सातत्याने वाढ होत आहे, त्यामुळे नियमित तपासणी व आरोग्य जनजागृती अभियान ही काळाची गरज आहे. आपल्या आरोग्याकडे दुर्लक्ष करू नका आणि वेळोवेळी तपासणी करून घ्या, असे आवाहन त्यांनी केले.
बदलापूर व परिसरातील नागरिकांनी या शिबिरात मोठी उत्सुकता दाखवून आरोग्य विभागाच्या या प्रयत्नाचे स्वागत करून भविष्यातही अशी शिबिरे होत राहतील अशी अपेक्षा व्यक्त केली.
