कराची : आंदोलक अमेरिकन वाणिज्य दूतावासात घुसले, गोळीबारात नऊ ठार तर अनेक जखमी

आंदोलकांनी कराचीतील यूएस वाणिज्य दूतावासात प्रवेश करण्याचा प्रयत्न केला आणि इमारतीची तोडफोड केली, गोळीबारात किमान नऊ जण ठार झाले. कराची येथील सिव्हिल हॉस्पिटलमधील वरिष्ठ डॉक्टरांनी बीबीसी न्यूजच्या उस्मान जाहिदला सांगितले की, कराचीमधील यूएस वाणिज्य दूतावासाजवळ पोलिसांशी झालेल्या हिंसक संघर्षानंतर नऊ मृतदेह आणि किमान 32 जखमींना रुग्णालयात आणण्यात आले.

ईधी फाऊंडेशनच्या अधिकाऱ्यानेही पुष्टी केली आहे की त्यांनी नऊ मृतदेह आणि डझनभर जखमींना रुग्णालयात हलवले आहे. पोलिसांनी आंदोलकांना कॉन्सुलेट कॉम्प्लेक्समध्ये प्रवेश करण्यापासून रोखण्याचा प्रयत्न केला तेव्हा चकमक झाली. पोलिसांकडून अद्याप कोणतेही अधिकृत वक्तव्य जारी करण्यात आलेले नाही.

अमेरिकन वाणिज्य दूतावास कराचीतील बंदराजवळ आहे.

सोशल मीडियावरील व्हिडिओंमध्ये असे दिसून येते की काही लोक गेट तोडून आत शिरले, त्यानंतर रिसेप्शन आणि सुरक्षा कक्षाच्या काचा फोडल्या.

मजलिस वाहदत मुस्लीमीनच्या प्रवक्त्यानुसार, हा एक सार्वजनिक निषेध होता ज्यामध्ये एका धार्मिक व्यक्तीच्या मृत्यूच्या प्रतिक्रियेसाठी सामान्य लोक अमेरिकन वाणिज्य दूतावासात पोहोचले होते. आंदोलकांवरही आतून गोळीबार करण्यात आल्याचा दावा त्यांनी केला.

गोळ्या कुठून आल्या आणि कोणी गोळीबार केला, हे अद्याप पोलीस आणि प्रशासनाकडून स्पष्ट करण्यात आलेले नाही.

पोलिस सर्जन डॉ. सामिया सय्यद यांनीही मृत्यूला दुजोरा दिला आहे.

कराची पोलिसांचे डीआयजी ईस्ट झोन सांगतात की, काही आंदोलक वाणिज्य दूतावासात घुसण्यात यशस्वी झाले, मात्र पोलिसांनी घटनास्थळी पोहोचून परिस्थिती नियंत्रणात आणली.

दुसरीकडे, प्रांतीय अंतर्गत मंत्री झियाउल हसन लिंजार यांनी अतिरिक्त आयजी कराची यांच्याकडून अमेरिकन वाणिज्य दूतावासाबाहेर झालेल्या निषेधाचा तपशील मागितला आहे.

कोणालाही कायदा हातात घेऊ दिला जाणार नसून शांतता व सुव्यवस्था बिघडविणाऱ्या घटकांवर कायद्यानुसार कारवाई केली जाईल, असे प्रांतमंत्र्यांनी निवेदनात म्हटले आहे. संवेदनशील प्रतिष्ठानांची सुरक्षा अधिक कडक करण्याचे निर्देश त्यांनी पोलिसांना दिले.

अमेरिकन आणि इस्रायली हल्ल्यात इराणचे सर्वोच्च नेते अयातुल्ला खामेनी यांच्या मृत्यूची पुष्टी केल्यानंतर, जगातील विविध देशांमध्ये अमेरिकन दूतावास आणि वाणिज्य दूतावासाबाहेर निदर्शने झाल्याच्या बातम्या येत आहेत.

बगदाद, इराकमधील अमेरिकन दूतावास असलेल्या ग्रीन झोनमध्ये आंदोलक घुसण्याचा प्रयत्न करत आहेत.